Македонската фудбалска јавност со голема поддршка и чувство за солидарност и хуманост ќе ја бодри нашата репрезентација на арената „Тодор Проески“ во Скопје.
Македонската А репрезентација денеска против Велс го игра натпреварот од второто коло од квалификацискиот циклус за пласман на Светското првенство 2026.
Селекторот Благоја Милевски на вчерашната прес-конференција истакна дека Велс е анализиран и мисли дека се подготвени.
-Ние не сме фаворити. Според ранкингот и квалитетот на Велс се работи за противник кој екстра квалитетни играчи. Сепак, во спортот не секогаш фаворитите победуваат. На нас е да бидеме максимално подготвени, а колку ќе успееме до позитивен резултат ќе видиме. Велс е можеби најсериозен противник откако сум досега на кормилото на А-репрезентацијата. Ова е компактна селекција, тркачки совршена, технички многу унапредена и не очекува сериозен тест. Сега ќе играме со различен противник од саботата, вели Милевски.
Голманот Столе Димитриевски истакна дека во овие тешки момент народот мора да биде сплотен.
-Пред натпреварот со Лихтенштајн беше доста тешко поради трагедијата. По случувањата во претходните денови ми беше тешко да заспијам, бидејќи бев емотивен по тоа што го видов. Сега ова што ни следува, на Македонија и овој народ му е потребен љубов. Треба да бидеме сплотени и сите заедно, целиот народ. Во овој момент не помага ништо, па можеме да дадеме само љубов. Мојата порака до народот е да бидеме сплотени. Секогаш кога доаѓав на прес-конференции имавме „чиста мрежа“, ајде нека биде така и против Велс. Нека биде ова нова среќа. Би сакал да имаме нов добар натпревар, работиме на тоа и подготвени сме. Ако успееме да се одбраниме имаме најмалку реми, а зошто да не дојдеме и до победа, смета Димитриевски.
Селекторот на Велс, Крег Белами ја сподели својата солидарност за трагедијата што ја погоди Македонија пред натпреварот во Скопје.
-Пред се, би сакал да изразам сочувство на семејствата на жртвите на трагедијата во Македонија. Знаеме низ што поминува земјата и целиот народ, ние во Велс се имаме соочено со многу трагедии, па сакам во името на целиот Велс да кажам дека жалиме со вас заради трагедијата. Тешко е да се зборува за фудбал во ова време, изјави Белами.
Белами исто така истакна дека во последните денови направиле анализа на Македонија како екипа, нагласувајќи ги нивните добри контра напади. Тимот ќе мора да ги задржи и добрите поединци на составот. Истакна дека Македонија ќе биде многу мотивирана.
Македонската фудбалска јавност со голема поддршка и чувство за солидарност и хуманост ќе ја бодри нашата репрезентација на арената „Тодор Проески“ во Скопје.
Според последните информации околу 20.000 билети се продадени за вечерашниот натпревар, а средствата од продажбата на билетите ќе бидат донирани за повредените и семејствата на загинатите во пожарот во дискотеката „Пулс“ во Кочани.
