Тодорова сабота е празник посветен на светиот великомаченик Теодор Тирон, кој во македонската народна традиција се смета за заштитник на добитокот.
Според христијанското предание, кога царот Јулијан Отпадникот наложил на пазарите да се попрска сета храна со крв од жртвени животни, свети Теодор му се јавил на епископот Евдоксиј и му препорачал на народот да јаде варена пченица. За да се потсетиме на овој настан, во петокот по литургијата се чита молебниот канон на свети Теодор.
Народни верувања и обичаи во Македонија
Во многу македонски села се сочувани народни верувања дека на Тодорова сабота свети Теодор излегува на бел коњ, најавувајќи го пристигнувањето на пролетта. Се верува дека токму тогаш првпат во годината излегуваат змиите од зимскиот сон.
Тодорова сабота има посебно значење во македонската народна традиција и е празник кој ја најавува пролетта, носејќи надеж за бериќетна година, здрав добиток и заштита од болести.
Во Македонија, Тодорова сабота се слави со посни јадења, бидејќи празникот се слави во време на Великиот пост. За среќна и бериќетна година, домаќинките најчесто подготвуваат варена пченица (коливо), традиционален леб (погача) и колачи во форма на потковици.
