Глетката на Пелистер е повеќе од вознемирувачка. Старата моликова шума на неколку локации не ги издржа снежните наноси и силните ветрови оваа зима.
Засега нема проценка колку молики се уништени или на колкава површина, но штетите се огромни. Експертите и вработените во НП Пелистер бараат начин како да се спаси она што остана, но и да се спречи болестите да ги заразат здравите стебла.
-Штетата која е настаната не е за потценување и не смееме така да ја оставиме. Целта на овој настан е да отпочнеме со еден процес на зачувување на најкомпакната моликова шума што ја имаме во регионот, вели Иванчо Тошевски, директор НП Пелистер.
Ваквата состојба е повеќе последица на популистички, наместо одгледувачки мерки, што понекогаш значи и сечење на старите стебла. Но, под притисок на јавноста, планот за ревитализација често не се применувал, или незначително се спроведувал, велат од НП Пелистер.
-Тој дел на Пелистер е туристичка зона, односно најпосетен е, секогаш во минатото се избегнувало според тие планови за одгледување да се спроведат некакви мерки, тоа резултира со ова што го имаме. Доколку би се спроведувале во минатото тие одгледувачки мерки немаше ова да биде од вакви размери, вели Зоран Пројчевски, НП Пелистер.
Инспекторатот за шумарство веќе издаде решение за отстрануавање на паднатите дрвја со конкретни рокови.
-Ќе се работи континуирано, без прекин бидејќи паднатата дрва маса е причина и за болести, затоа што веќе има појава на сушење на моликата, но, тие се голема опасност и при појава на пожари, Марјан Мицев, главен инспектор за шумарство.
Потоа ќе се обновува старата моликова шума, мерка која во изминатите години не се спроведувала редовно. Но, експертите смируваат Пелистер нема да остане без својата молика.
-Подмладни јадара значат создавање природна обнова од молика на истите места каде старите дрвја угинале, вели проф.др. Никола Велковски од Шумарски факултет УКИМ Скопје.
Планот за спас на моликата ќе се спроведува во неколку фази. Македонскиот бор како што му е и официјалното име е исклучително значен ендемичен вид, а тој е причина што Пелистер во 1948 година е прогласен за национален парк, прв во државата.
