Општина Битола продолжува со инвестициите во подобрување на инфраструктурата, овој пат со поставување на атмосферска канализација на улица „СРУ 5“. Денес, секретарот на општината, Борче Димитровски, заедно со претставници од одделението за комунални дејности, изврши увид во градежните активности кои ги изведува КЈП Нискоградба, согласно предвидената динамика.
Со инвестиција од 773.864 денари, овој проект претставува значаен чекор кон подобрување на условите за живот на граѓаните и унапредување на урбаната инфраструктура. По завршувањето на оваа фаза, ќе следува поставување на нова водоводна мрежа и коловоз, со што улицата „Крушевска Република“ ќе се поврзе со „Партизанска“, значително олеснувајќи го сообраќајниот метеж во овој дел од градот.
Ова е уште еден доказ за посветеноста на општина Битола кон подобрување на комуналната инфраструктура и создавање на поквалитетна урбана средина за сите граѓани.
