Градоначалникот на општина Битола, Тони Коњановски, денеска изврши увид во градежните активности на влезот во Битола од страната на Прилеп, каде што во тек е реконструкцијата на улицата „8 Септември“. Заедно со него беа и советникот Бојан Бојкоски и претставници од општинската администрација, кои го следат напредокот на проектот.
„Работите се одвиваат според планот и договорената динамика. Во моментот се изведува реконструкција со дислокација на мешовитата канализација, од која веќе се завршени 550 метри. Паралелно, се работи на изградба на армиранобетонски потпорен ѕид, со што ќе се зајакне инфраструктурата на овој важен патен правец“, изјави Коњановски.
Досега се реализирани околу 20% од вкупниот проект, вклучувајќи изградба на атмосферска канализација во должина од 735 метри, мешовита канализација од 550 метри, водоводна мрежа од 270 метри, како и 8,5% од предвидените коловозни работи.
Според предвидениот рок, до средината на летото ќе се заврши асфалтирањето на левата коловозна лента, по што сообраќајот ќе се пренасочи на новоасфалтираната површина. Ова ќе овозможи побезбедно и поефикасно изведување на работите на десната лента, без да се попречи нормалното движење на возилата.
„Целта ни е овој проект да биде завршен квалитетно и во предвидениот рок, за да добиеме модерен и функционален влез во градот“, нагласи Коњановски.
Проектот е дел од пошироката стратегија на општина Битола за подобрување на патната инфраструктура и зголемување на безбедноста во сообраќајот.
