Ден по ставањето на Артан Груби на Црната листа на САД, шаторот пред Уставен суд кој го постави ДУИ, за како што викаа дека ќе го бранеле албанскиот јазик е празен.
Вчера по координација на коалицијата „Европски фронт“ беше кажано дека лидерите ќе се вклучат на страќата, но денеска ги нема ниту нив, ниту други активисти, а ги нема ниту масите и „печурките“ за греење.
Како да се спакувале иако најавија дека ќе биле таму до седницата на Уставниот суд.
Стејт департментот на Соединетите Американски Држависоопшти дека воведува санкции против поранешниот заменик-претседател на Владата на Македонија Артан Груби и судијата на Апелацискиот суд Енвер Беџети поради нивна вмешаност во значителна корупција.
Според соопштението, Груби и Беџети примале мито со цел да ги поткопаат судските процеси поврзани со кривичната осуда на Сашо Мијалков, поранешен директор на Управата за безбедност и контраразузнавање (УБК). Мијалков беше санкциониран во 2022 година за значителна корупција според Секцијата 7031(в) од Законот за надворешни операции и поврзани програми на Стејт департментот.
Покрај санкциите за Груби и Беџети, забрани за влез во САД се воведени и за членовите на нивните семејства.
Овие мерки се дел од глобалната иницијатива за борба против корупцијата и злоупотребите на човековите права, која се спроведува по повод Меѓународниот ден за борба против корупцијата и Денот на човековите права.
По објавата дека поранешниот прв вицепремиер Артан Груби и судијата Енвер Беџети се новите две имиња на црната листа на Стејт департментот, во официјален статус амбасадорката на САД во Македонија, Анџела Агелер, порача дека „политичкото мешање во судството не може и нема да се толерира“.
Денешното назначување на Артан Груби и Енвер Беџети е доказ дека политичкото мешање во судството не може – и нема – да се толерира. САД ќе продолжат да ги именуваат оние кои се вклучуваат во значителна корупција која ги поткопува демократските институции. Никој не е над законот, а одговорноста е суштинска за напредок, истакна амбасадорката Агелер.
