Турција го отвора својот граничен премин Јајладаги со Сирија за да управува со безбедно и доброволно враќање на милиони сириски мигранти во нивните домови, изјави во понеделникот претседателот Реџеп Тајип Ердоган, откако бунтовниците го присилија претседателот Башар ал-Асад да ја предаде власта.
Во една од најголемите пресвртници за Блискиот исток во последните генерации, бунтовниците без борба ги заземаа големите сириски градови, вклучително и сириската престолнина Дамаск, а Асад како што беше објавено подоцна заминал во Русија, по 13 години граѓанска војна и повеќе од 50 години секуларно авторитарно владеење на неговото семејство.
„Го отвораме граничниот премин Јајладаги за да спречиме каков било метеж и да го олесниме сообраќајот“, рече Ердоган по состанокот на владата во Анкара.
Преминот Јајладаги во близина на северозападниот раб на Сирија е затворен од 2013 година поради борбите во близина на границата.
„Ние, исто така, ќе управуваме со обработката на доброволното враќање на мигрантите на начин што одговара на нашиот прием“, рече Ердоган.
Министерот за надворешни работи Хакан Фидан изјави претходно во понеделникот дека Турција ќе работи на безбедно и доброволно враќање на сириските мигранти во нивните домови.
Турција, иако од теренот имаше информаци за вклученост на нејзините единици на територијата на Сирија, вели дека не поддржува или не е вклучена во офанзивата на сириските исламистички сили што ги поддржува со години против Асад, во неделата рече дека сака новата сириска администрација да биде инклузивна и Сиријците сами да ја одредат својата иднина.
Во своето обраќање на Конференцијата на турските амбасадори во Анкара, Фидан рече дека Турција е подготвена да даде поддршка за обновата на Сирија и да се координира со сите „регионални актери и страни“.
Додаде дека Анкара ќе застане на страна на Сиријците во оваа „нова фаза“ во Дамаск, но дека групите како Исламската држава и Работничката партија на Курдистан (PKК), кои Анкара ги смета за терористички организации, не смеат да имаат полза од оваа ситуација.
Членката на НАТО прими околу три милиона сириски мигранти и бегалци, што ја прави најголемиот домаќин Сиријци кои бегаат од граѓанската војна.
Турција, исто така, контролира делови од земјата во северна Сирија по неколку прекугранични упади против курдската милиција Единици за заштита на народот (YPG) која е главната борбена сила на опозициските Сириски демократски сили (SDF) поддржувани од САД, којашто Анкара ја смета за сириско крило на PKK.
