Претседателката на Република Македонија, Гордана Сиљановска Давкова, беше покровителка на манифестацијата посветена на Вељо Манчевски, првиот верски референт на Македонија. Во својот инспиративен говор, претседателката ја истакна важноста на духовноста како неизоставен дел од националниот развој, поврзувајќи ја со солидарноста, толеранцијата и хуманоста како основни вредности на општеството.
„Честа да сум покровителка на оваа манифестација не е само лична благодарност, туку и длабока инспирација од извонредноста што ја симболизира името на Вељо Манчевски. Ова признание треба да биде поттик за сите кои се залагаат за општествен прогрес и пример за нераскинливата врска меѓу духовноста и националниот развој,“ изјави Сиљановска Давкова.
Таа подвлече дека градењето на Македонија како просперитетна и правична држава бара посветеност кон моралните вредности, хуманоста и владеењето на правото. Претседателката изрази голема благодарност кон сите учесници и поддржувачи на оваа иницијатива, истакнувајќи дека „мали се зборовите за вашата големина“.
Манифестацијата е посветена на оддавање почит кон Вељо Манчевски и неговиот придонес за духовниот и национален идентитет на Македонија, истовремено потсетувајќи на важноста од зачувување на овие вредности во современото општество.
