„Со големо задоволство го отвораме новиот модерен „Парк на шахот“ во населбата 11 Октомври Бараки, кој зафаќа површина од 4000 м². На местото каде што претходно се наоѓаше дива депонија, сега жителите на нашата општина добија прекрасно уредено катче, со современа урбана опрема, хортикултурно уредување и шаховски маси, каде љубителите на шахот ќе можат да уживаат во оваа интелектуална игра.
Во центарот на паркот се поставени статуетки на кралот и кралицата – симболи на значењето на шахот како игра која поттикнува умствен развој и стратегиско размислување. Особена благодарност упатувам до Шаховската федерација на Македонија и нејзиниот претседател, Саша Богдановиќ, за поддршката во овој проект.
Ова партнерство покажува како заедно можеме да создадеме нешто вредно и трајно за нашите граѓани. Шахот, како игра на стратегија и размислување, носи многубројни придобивки – го зголемува фокусот, ги развива когнитивните способности и ги поттикнува аналитичките вештини. Сигурен сум дека овој парк ќе биде место за дружење и рекреација за сите генерации, особено за шахистите и љубителите на шахот.
Претворањето на оваа поранешна депонија во зелен парк е не само голем естетски придонес туку и важен еколошки потег, што значително ќе го подобри квалитетот на животната средина во нашата општина. Ова е уште еден пример за трансформација на некогаш запоставени места во простори за релаксација и забава. Сакам да најавам дека ваквите проекти ќе продолжат и во иднина.
Апелирам до сите жители совесно да се однесуваат кон новата урбана опрема и зеленилото, бидејќи само заеднички можеме да го зачуваме овој нов парк во општина Кисела Вода, создаден за дружење и релаксација. Мојот народ заслужува!“
