Еве што викаат од Центарот за јавно здравје
Количеството на вода за пиење што се снабдува во Тетово е намалено, но таа е чиста и безбедна.
Од Центарот за јавно здравје истакнуваат дека водата од градскиот водовод редовно се тестира и е безбедна за пиење. Во последниот период, поради нејасни информации во јавноста, некои граѓани се сомневаа за нејзината исправност. Како што објаснува д-р Ратко Давидовски, специјалист по хигиена и здравствена екологија, по обилни врнежи од дожд доаѓа до заматување на површинските води од Лешничкиот водоснабдителен систем, поради што филтер станицата се исклучува, а со тоа и дотокот на вода се намалува.
„После несоодветно пренесени изјави од комуналното претпријатие, сакам да нагласам дека водата во Тетово се контролира редовно и е безбедна за пиење. Количините се намалени поради заматувањето на Лешничката река, што предизвика автоматско исклучување на филтер станицата, како и поради некои дефекти“, изјави д-р Давидовски.
Локалната самоуправа најавува дека ќе се изврши сервисирање на филтрите и ќе се зголеми капацитетот на водата, а истовремено се бара долгорочно решение.
„Јавното комунално претпријатие е во контакт со фирмата која ја изгради филтер станицата, и во наредниот период ќе се работи на изнаоѓање на трајно решение за снабдувањето со вода од Лешница, без прекини дури и при обилни дождови“, изјави градоначалникот на Тетово, Биљал Касами.
Лешничкиот систем, пуштен во употреба во 2017 година, заедно со изворите и бунарите, требаше да ги задоволи потребите на градот, но освен проблемите со филтер станицата, честопати се појавуваат и дефекти на мрежата. Тетово исто така се соочува со недостаток на вода поради неконтролирана урбанизација и нерационално трошење.
