На плоштадот „Матодија Андонов Ченто“ во Прилеп, околу 1200 основци и средношколци денес го формираа македонското знаме во чест на националниот празник „11 Октомври“.
Оваа традиција, воспоставена во 2010 година, имаше прекин од пет години за време на пандемијата. Знамето, со димензии 24 на 12 метри, е формирано со учество на четири ученици од секој квадратен метар, кои доаѓаат од основните и средните училишта во градот и околината.
„Знамето симболизира востанието на 11 октомври, кое започна во Прилеп против фашистичкиот окупатор“, изјави Златко Думбалоски, наставник и координатор на настанот.
Думбалоски истакна и иницијатива до Советот на општината да се воведе изведба на химната секој понеделник пред почетокот на часовите.
Општината ја поддржува традицијата на формирањето на знамето и најавува предлог одлука за редовно интонирање на химната.
„Со гордост ја продолжуваме оваа традиција, која ја отсликува нашата љубов кон татковината“, изјави Ирена Стерјоска Локвенец, претседателка на Советот на општина Прилеп.
Вечерва, со почеток во 19 часот, ќе се одржи централната прослава за 11 Октомври. Програмата вклучува настапи на камената бина на плоштадот „Александрија“, посета на меморијалниот музеј „11 Октомври“ и традиционален импровизиран напад на градот со богат огномет, како потсетник на историјата од 1941 година.
