Глумци, пејачи, политичари, уметници, инфлуенсери, спортисти и други јавни личности повеќе нема да можат да промовираат обложувалници и компании кои нудат посебни игри на среќа, според измените и дополнувањата на Законот за огласување, кој моментално е на јавна расправа во Србија.
Измените во законот прават разлика помеѓу класичните игри на среќа (како лото, среќни лозови, бинго и томбола) и посебните игри на среќа, кои вклучуваат карти (покер, блекџек), автомати, како и спортски и други типови обложување.
Новиот закон предвидува забрана за рекламирање на класичните игри на среќа на јавни површини, освен ако се оддалечени најмалку 100 метри од училишта, здравствени установи или институции за деца и малолетници.
Дополнително, рекламите за обложувалници ќе бидат забранети на отворени јавни места, како и во јавниот превоз, такси возила и други транспортни средства. Оваа забрана ги вклучува и билбордите, плакатите, светлечките реклами и дисплеите.
Сепак, рекламите за обложувалници и игри на среќа ќе бидат дозволени на спортски терени за време на спортски настани, под услов обложувалниците да се спонзори на настаните или на играчите.
Забраната за рекламирање ќе важи и за телевизиите кои емитуваат на национални и кабловски фреквенции, освен за време на спортски преноси. Рекламите ќе можат да се емитуваат 30 минути пред и по спортските настани, со максимум 10 огласни пораки, секоја во траење од 30 секунди, пренесува Н1.
