Мејловите со дојави за поставени бомби, кои веќе подолг период пристигнуваат на адресите најчесто на образовните институции, а во последно време и на шопинг-центри и места за транспорт, не ги заобиколија ниту спортските институции.
Утринава таква закана пристигнала во електронското сандаче на Фудбалската федерација на Македонија (ФФМ), салата „Борис Трајковски“, како и на националната арена „Тодор Проески“ и фудбалските тимови Вардар и Работнички.
Ова значи привремен прекин на тренажните активности во двата спортски објекти, како и на работата на административците во Куќата на фудбалот. Полицијата е информирана за дојавите, објектите веднаш се евакуирани, а се очекува наскоро да бидат проверени од посебни екипи кои ќе ја претресат секоја педа за да проверат дали и овие дојави се лажни како и сите досега.
