Професорот и поет Сулејман Мехази за косовскиот весник „Бота сот“ тврди дека над две третини од земјиштето во Македонија им припаѓа на Албанците!
„Албанските земји не само во РСМ, туку и во Косово, Чамерија, Црна Гора и Јужна Србија се конфискувани, украдени и ограбени од словенските, српските и грчките соседи. По доаѓањето на демократијата, многу албански граѓани со благородно потекло бараа од македонските влади недвижностите одземени и насилно конфискувани од комунистичките власти на Македонија да им се вратат на сопствениците, имотот што го проголтаа славомакедонските комунисти. До денес многу конфискувани, национализирани и експроприрани имоти на албански граѓани остануваат заробени, ограбени и присвоени од владетелите на оваа земја“, вели Мехази.
Според него, 70 отсто од земјиштето во Македонија им припаѓало на локални жители Албанци, а само 30 отсто на Срби и на Македонци.
„Многу Албанци кои се преселиле во Турција трчаат по судовите за да си ги вратат конфискуваните земји, но без никаков успех. Комунистичките системи им ги конфискувале имотите на Албанците, а на тапиите и во катастрите на имоти ги запишувале сопствениците на одземената земја, но за време на демократските транзиции во РСМ стана уште полошо, па имотите запишани во катастрите на Албанците беа заменети со имиња на функционери и членови на владејачката партија. Според вакафите на Отоманската империја, 70 проценти од земјиштето и движните средства во Македонија им припаѓале на локални албански граѓани, а само 30 отсто на српски и македонски граѓани“, процени тој.
Мехази ги повика партиите на Албанците во Македонија да побараат враќање на овие имоти.
„Најмудрата борба на албанските партии во РСМ би била, покрај за власта, да побараат закон за денационализација на албанските земји од Преспа, Охрид, Струга, Дебар, Кичево, Гостивар, Тетово, Скопје, Куманово, Велес, Прилеп, Штип и Битола. Спорно е кој ги одзел албанските имоти на градот на албанската азбука, Битола, кој пред Втората светска војна бил 65 проценти во сопственост на Албанци, како е можно пред земјотресот, 1963 година, Скопје и околината да биле 70 отсто албански, каде отишле и кој им ги одзел имотите на Албанците? Најголем успех на албанските партии би бил враќањето на имотите на албанските сопственици, а потоа на власта, а не на Албанците власта, а на Македонците имотите. РСМ е во сопственост на Албанци земјопоседници, а не со раководни позиции, владите доаѓаат и си одат, албанските земји остануваат засекогаш“, нагласува професорот Мехази за „Бота сот“.
