Навивачката група Комити објави дека денеска останале без уште еден член кој бил и еден од предводниците на групата, Марјан Георгиев – Црни. Според информациите на полицијата Георгиев загинал бил повреден во сообраќајна незгода на улицата „Скупи“, а лекарите во скопскиот клинички центар констатирале смрт.
-Ненадејно не напушти една навивачка супер ѕвезда, човек кој Западната трибината го памети уште од основањето на групата. Комити останаа без една навивачка икона, кој своевремено беше еден од оние кои ја основаа а потоа и предводеа групата, од времето на Сокол, заедно со него но и по него. Природен лидер, кој влеваше стравопочит кај оние кои само малку го познаваа. Оние кои го запознаа вистински, во него видоа голем другар, доследен на принципите, со Вардар во срцето до последниот ден од својот живот, се вели во фејсбук објавата.
Градскиот асвалт го памети како еден силен човек, кој во својот животен век проживеа повеќе животи, култна личност кој остави трага која не може да биде избришана. Карпош загуби една голема легенда, и човек со срце планина, стои понатаму во објавата.
Министерството за внатрешни работи информираше дека вчера во 05.50 часот било пријавено дека на ул.„Скупи“ се случила сообраќајна несреќа помеѓу патничко моторно возило „голф“ со скопски регистарски ознаки, управувано од Б.О.(27) од Скопје и мопед „пежо“ со скопски регистарски ознаки, управуван од Г.Ц.(30) од Скопје, по што возилото го напуштило местото на настанот, но подоцна возачот самиот се пријавил во Полициската станица Бит Пазар. По несреќата Г.Ц. и сопатникот од мопедот М.Ѓ.(50) од Скопје биле пренесени во Комплексот клиники “Мајка Тереза“ каде од страна на лекар на Г.Ц. му биле констатирани тешки телесни повреди, а М.Ѓ. околу 12.00 часот им подлегнал на повредите.
– Полицијата извршила увид на местото на настанот, стои во полицискиот билтен.
Загина, но името твое нема да загине. Загина но нема да сме мирни додека душата твоја не биде слободна, му порачуваат другарите и пријатели од навивачката група Комити.
