Цената на парното греење што важи од 1 јануари е зголемување за 14,05 отсто за сите корисници во Градот Скопје, односно и за трите компании кои ги снабдуваат граѓаните – Балкан енерџи груп (БЕГ), ЕСМ Енергетика и Скопје Север, по одлука на Регулаторната комисија за енергетика.
Но Скопјани и денеска се жалат на проблеми со греењето. Велат дека парното се вклучува многу доцна, но и дека е слабо. Сметаат дека е недозволиво во ек на зима, со вакви темепратури, нивните домови да бидат ладни.
Од БЕГ, пак, тврдат дека системот за централно греење е стабилен и се испорачува топлинска енергија до потрошувачите.
Во услови на енергетска криза системот работи во оптимизиран режим се со цел темепратурите до домовите да се одржуваат на 20 степени. Рекламациите кои досега се евидентирани во центарот за грижа на потрошувачи се однесуваат на поединечни станови или објекти каде екипите веднаш излегле на терен, се вели во дописот од компанијата.
Од РКЕ им соопштија на граѓаните, кои не добиле соодветна услуга од страна на снабдувачот со топлинска енергија, да поднесат приговор до нив. Дополнително, од Комисијата објаснуваат дека снабдувачот има обврска во текот на грејната сезона да обезбеди минимум 20+1 степени во времетрање од 6 наутро до 22 часот во текот на денот.
И вчера граѓани од Карпош, Центар, Аеродром, Кисела Вода се пожалија дека имаат проблеми со греењето. А веќе неколку дена без парно се и околу 500-тини домаќинства од Бутел и Чаир. Велат цела година плаќаат сметки за парно, а сега со греалки се обидуваат да ги стоплат домовите.
Од Топлификација Скопје Север се надеваат дека Општина Чаир од понеделник ќе го плати долгот за да може да купат гас и да го вклучат греењето. Сепак, од таму потенцираа дека тоа не е решение за нивните проблеми затоа што Скопје Север АД се соочува со сериозни финансиски пролеми поради сериозниот раст на цената на гасот.
Граѓаните се мачат дека дома децата им смрзнуваат, и најавуваат приговори, а прашуваат како е возможно да плаќаат поскапо парно а радијаторите да се млаки, топлина од нив речиси и да нема, оббинуваат дека се вршат рестрикции во сред зима.
