Сè поголем број граѓани во Германија изразуваат страв и несигурност во јавниот простор, покажува новата анкета „Deutschlandtrend“ на јавниот сервис ARD, спроведена почетокот на ноември меѓу 1.300 испитаници. Според резултатите, секоја втора личност изјавила дека се чувствува небезбедно на улиците и во јавниот превоз – двојно повеќе отколку пред осум години.
Најчести се стравовите од кражби и вербални напади, а многу поретко од физичко или сексуално насилство. Истовремено, германската полиција регистрирала повеќе од 265.000 случаи на семејно насилство во 2024 година, што е нов рекорд – три четвртини од жртвите се жени.
Растот на чувството на несигурност се поврзува со јавната дебата за миграцијата и безбедноста, што ја поттикна канцеларот Фридрих Мерц со изјавите дека „изгледот на германските градови“ се променил поради неинтегрирани мигранти.
Анкетата покажува и пораст на економската загриженост – 28% од граѓаните ја сметаат економијата за клучен проблем, а 32% миграцијата. Темите за социјална правда, екологија и климата се во пад.
Само 26% од Германците ја сметаат општествената ситуација за стабилна, а довербата во политиката е на ниско ниво. Дури 79% од испитаниците сметаат дека владината коалиција меѓу CDU/CSU и SPD не е единствена и не успева да решава проблеми.
Кога би се одржале избори следната недела, CDU/CSU би добиле 27%, SPD 14%, што значи дека актуелната влада веќе нема парламентарно мнозинство.
