Американскиот долар порасна во однос на кошничката светски валути втора недела по ред, иако Федералните резерви повторно ги намалија клучните каматни стапки. Индексот на доларот, кој ја мери вредноста на валутата во однос на шест водечки валути, се искачи за 0,8 проценти – на 99,72 поени.
Доларот зајакна и во однос на еврото за 0,8 проценти, со што заедничката европска валута се спушти на 1,1535 долари. Во однос на јапонскиот јен, американската валута се зголеми за 0,75 проценти и достигна ниво од 154 јени за долар.
Иако намалувањето на каматните стапки на ФЕД за 0,25 процентни поени беше очекувано, изјавите на претседателот Џером Пауел изненадија многу инвеститори. Пауел порача дека понатамошните намалувања во декември не се извесни и дека дел од раководството на централната банка смета дека поради високата инфлација треба да се почека со нови потези.
Пазарот веднаш реагираше – шансите за ново намалување на каматните стапки годинава паднаа од над 90 на под 70 проценти. Ваквите очекувања ја засилија позицијата на доларот, бидејќи каматните стапки во САД остануваат значително повисоки од оние во другите големи економии.
Во моментов каматните стапки на ФЕД се движат меѓу 3,75 и 4 проценти, додека Европската централна банка ги задржа своите на околу 2 проценти. Банката на Јапонија, пак, остана на 0,5 проценти, и покрај најавите дека би можело да дојде до зголемување доколку економијата продолжи да расте.
Јенот ослабе и поради политичките промени во Токио – парламентот ја избра Санае Такаичи како прва жена премиер во историјата на земјата. Нејзината најавена стимулативна фискална политика и можниот притисок врз централната банка да не ја затегнува монетарната политика придонесоа за пад на јенот, кој во еден момент надмина 154 за долар – највисоко ниво во последните девет месеци.
Поддршка на американската валута донесе и принципиелниот договор меѓу Вашингтон и Пекинг. На состанокот меѓу Доналд Трамп и Си Џинпинг беше договорено САД да ги намалат царините за кинески производи на 10 проценти, а Кина да продолжи со купување американска соја, да ја олесни трговијата со ретки метали и да преземе мерки против нелегалниот фентанил.
Иако договорот беше поздравен како позитивен чекор, аналитичарите предупредуваат дека станува збор за „тактичко примирје“, а не за суштинско подобрување на трговските односи меѓу двете најголеми светски економии.
