Два дрона од непознато потекло беа забележани во близина на воената база Реедо во јужна Естонија, при што еден од нив беше соборен од силите на НАТО, објавија естонските медиуми. Инцидентот се случи на 17 октомври, а базата, која се наоѓа околу 250 километри југозападно од Талин, е значајна за ротацијата на американските сили стационирани во земјата.
Лиис Ваксмaн од Главниот штаб на Естонија изјави дека обидите на вооружените сили и Одборот за полиција и гранична заштита да го пронајдат соборениот дрон биле неуспешни. „Вооружените сили не коментираат детално инциденти поврзани со безбедноста“, додаде таа.
Овој настан се случува во време на зголемено набљудување на мистериозни дронови низ Европа, што создава загриженост за можна руска вмешаност во хибридно војување и безбедноста на НАТО.
Естонија, членка на НАТО од 2004 година со население од 1,37 милиони, има граница со Русија долга 290 километри, што ја прави една од најизложените членки на Алијансата. Земјата веќе се соочила со нарушување на воздушниот простор од Русија; на 19 септември, три руски ловци МиГ-31 влегле во естонскиот воздушен простор над Финскиот залив и останале таму 12 минути.
Естонскиот министер за надворешни работи, Маргус Цахкна, изјави за Kyiv Independent дека Естонија и нејзините сојузници мораат да бидат подготвени да пресретнат и соборат секој авион што ќе го прекрши суверениот воздушен простор. „Пораката мора да биде недвосмислена: идните прекршоци ќе се сретнат со одговор, вклучувајќи, ако е потребно, пресретнување и соборување на авиони. Не се работи само за одбрана на границите на Естонија, туку и за одбрана на границите на НАТО“, истакна Цахкна.
