Дубровник, 17 октомври 2025 – Зад блескавата фасада на „бисерот на Јадранот“ се крие сериозен проблем со дрога, предупреди градоначалникот Мато Франковиќ на седница на Градскиот совет. Според него, кокаинот се консумира во огромни количини – „месечно би можеле да се мерат во камиони, а не во грамови“.
Франковиќ истакна дека постојат два паралелни феномени: младите експериментираат со евтини таблети како екстази и амфетамин, додека богатите од досада и вишок пари шмркаат додека не се онесвестат. „Ситуацијата бара итна реакција – и едукативна, и институционална“, нагласи градоначалникот.
Локалната полиција потврди дека проблемот е сериозен. Само оваа година, во регионите околу Дубровник се извршени неколку крупни заплени на дрога: во јуни е пронајдено повеќе од два килограма амфетамин, половина килограм марихуана и над 80 грама кокаин, а во октомври – над еден килограм амфетамин заедно со марихуана. Дел од дрогата пристигнува преку морски и копнени патишта, користејќи ја туристичката инфраструктура како параван за трговија.
Експертите велат дека проблемот не е само криминален, туку и здравствен, воспитен и културен. Дубровник, иако се промовира како симбол на луксуз и медитерански престиж, со години се соочува со социјални пукнатини – големи разлики во богатството, млади без перспектива и елита која не сака да се соочи со сопствената зависност.
Градот најави формирање засилен Совет за превенција на криминалот, кој ќе работи на превенција преку едукација и јавни кампањи, како и координирани акции против мрежите за продажба на дрога. Сепак, прашањето останува: ако градоначалникот зборува, а сите молчат – кој ќе го спаси Дубровник?
