Администрацијата на американскиот претседател Доналд Трамп тајно ѝ дала овластување на ЦИА да спроведува тајни и потенцијално смртоносни операции во Венецуела и регионот на Карибите, објави Њујорк Тајмс, повикувајќи се на високи американски извори.
Новите овластувања ѝ дозволуваат на ЦИА да презема акции против претседателот Николас Мадуро или неговата влада – самостојно или како дел од поширока воена операција. Во моментот, во регионот се наоѓаат околу 10.000 американски војници, главно во Порторико, како и неколку воени бродови и подморница на Карибите.
Весникот потсетува дека ваквите наредби се меѓу најстрого чуваните тајни на Белата куќа и ретко стануваат јавни. Историјата покажува дека ЦИА често била вклучена во слични операции во Латинска Америка — од пучот во Гватемала во 1954 година, до оние во Чиле и Бразил, како и во обидите за убиство на Фидел Кастро.
