Во леринското село Овчарани, сместено во западното подножје на планината Ниџе, викендов се одржа културна средба меѓу Македонците од Егејска Македонија и нивните сонародници кои со децении живеат во Хрватска. Настанот беше организиран од македонската граѓанска асоцијација „Не’ има“ од Прилеп.
Овчарани, кое во грчките мапи е запишано како Мелити, брои околу 2.500 жители, од кои повеќе од 90 проценти се етнички Македонци. Тие гордо го зборуваат македонскиот јазик и ја негуваат традицијата преку културно-уметничкото друштво основано пред четири децении.
„До 1985 година беше забрането да се зборува македонски. Од 1986 почнавме јавно да го користиме јазикот и да пееме македонски песни. Денес сме слободни барем во тоа, но Грците сè уште не нè признаваат како Македонци,“ вели 70-годишниот жител Пандо Ашлаков.
Ашлаков, кого грчките власти го прекрстиле во Анастијазис Панајотис, смета дека Преспанскиот договор не донел ништо друго освен промена на името на државата Македонија.
Гостите од Хрватска, предводени од КУД „Св. Кирил и Методиј“ од Пула, приредија богата културно-уметничка програма со македонски песни, ора и рецитали, што прерасна во голема заедничка веселба.
„Корените не смеат да се заборават. Во Хрватска живееме убаво и ги имаме сите права, но важно е нашите деца да го носат македонскиот дух каде и да се,“ изјави претседателката на друштвото, Милена Златеска.
Средбата беше одбележана со силна емоција, гордост и заедништво, потврдувајќи дека македонскиот идентитет во Егејска Македонија продолжува да живее и се пренесува на новите генерации.
