Данската полиција во петокот навечер открила нелегално присуство на дронови над воздухопловната база Каруп, а вооружените сили потврдиле дека леталата биле забележани и на неколку други локации.
Последниве денови сведоци сме на низа слични инциденти околу данските аеродроми и воени објекти, што отвора сериозни безбедносни дилеми.
„Се појавува јасен образец, откако дроновите повторно беа забележани над Данска во саботата навечер“, изјави воениот аналитичар од Данската одбранбена академија, Андерс Пук Нилсен, за ТВ2. Тој предупреди дека станува збор за форма на хибриден конфликт, во кој државата мора да биде подготвена за неочекувано сценарио.
Според него, кога властите зборуваат за „способен актер“ зад овие активности, тоа упатува само кон една нација – Русија. „Целта е Москва да врши притисок за да се намали данската поддршка за Украина“, додаде Нилсен.
Тој нагласи дека ситуацијата е сè поопасна, бидејќи НАТО веќе дискутира кога и како да реагира со уривање на руски авиони доколку дојде до ново нарушување на воздушниот простор на Алијансата.
„Се движиме кон сериозен судир меѓу Русија и НАТО, кој лесно може да ескалира во вооружен конфликт. Ситуацијата е многу, многу сериозна“, заклучи воениот аналитичар.
