Теории на заговор за „атентат“ на Трамп поради кочење на ескалаторите во ОН
Во зградата на Обединетите нации вчера се случи кочење на подвижните скали додека ги користеше американскиот претседател Доналд Трамп. Радикални десничари на социјалните мрежи брзо започнаа да шират теории на заговор, тврдејќи дека станува збор за намерен пропуст со цел извршување на атентат.
Многу десничарски инфлуенсери поврзани со Трамповиот MAGA (Make America Great Again) движење тврдеа дека инцидентот бил дел од заговор. Меѓу нив, Мајк Сернович на платформата X објави дека „наводниот дефект на подвижните скали бил јасен знак за обид за атентат на Трамп“. Роџер Стоун, десничарски активист и лобист, исто така го поврза инцидентот со „обид за атентат“.
Освен тоа, десничарите ја критикуваа и Тајната служба на САД, тврдејќи дека агентите не реагирале адекватно, а некои повикаа обезбедувањето на Трамп да се довери на друга безбедносна структура.
Портпаролката на Белата куќа, Каролин Левит, објави дека администрацијата на Трамп бара „опсежна истрага на овој инцидент“.
Сепак, официјалното објаснување од ОН откри дека кочењето на подвижните скали било предизвикано од Трамповиот камерман и дека тврдењата на десничарите за атентат не се точни.
