Во Сплит, на раскрсницата меѓу улиците „Домовинског рата“ и „Слободе“, се случила сообраќајна несреќа во која учествувало службено полициско возило и приватен автомобил марка „Рено Меган“.
Според информациите на „Слободна Далмација“, полициското возило поминало на црвено светло со вклучена ротација и удрило во другото возило. Наводно, полицаецот бил на итна интервенција, која не била поврзана со утрешниот фудбалски натпревар.
„Далмација денес“ објави дека возачот на полициското возило имал околу 0,6 промили алкохол во крвта. Поради тоа, тој е суспендиран од должност до завршување на истрагата и против него ќе биде покрената дисциплинска постапка.
Од полицијата потврдуваат дека полицаецот и едно друго лице побарале лекарска помош по несреќата. Истражните органи работат на утврдување на сите околности.
