На само 28 дена до официјалниот почеток на изборната кампања за претстојните локални избори, СДСМ се нема изјаснето за кандидат за градоначалник на Пробиштип. Од сите општини кои ги раководат градоначалници на опозициската партија, СДСМ излезе со кадидати за сите, освен со противкандидат на Тони Тоневски.
Нема ниту информација дали партијата ќе ја поддршката на актуелниот градоначалник на Пробиштип, Драган Анастасов, кој го привршува својот втор последователен мандат.
Тони Тоневски довербата од својата партија, ВМРО – ДПМНЕ, ја доби уште во првата половина на јуни, кога официјално го соопштија како кандидат. Локалната јавност, Тоневски го познава како поранешен градоначалник на Пробиштип, во периодот од 2009-2017 година.
Што покажува ова за СДСМ, се откажува ли од Пробиштип?
Во политичката пракса, долготрајната неизвесност ретко носи предност. Колку подоцна се донесе одлуката, толку пократок е просторот за кампања, градење на профил на кандидатот и за мобилизација на организацијата да обезеди поддршка меѓу гласачите.
Само за илустрација, извршниот комитет на партијата досега имаше четири состаноци. По секој состанок, претседателот на партијата Венко Филипче соопштуваше нов „пакет“ на градоначалнички кандидати. Од вкупно четири „пакети“ со кандидати за прв човек на градот, во ниту еден не се спомна Пробиштип.
Познати се имињата на вкупно 57 кандидати на социјал – демократите, каде најголем број на градоначалниците, како Горан Герасимовски од Центар, Сашко Митовски од Крива Паланка, Перо Костадинов од Валандово одат за втор, односно трет мандат. Дел од актуелниградоначалници, како на пример оние во Берово, Делчево и Дојран ќе бидат заменети со свежи имиња.
Поради превирања во партијата, Филипче остана и без едно од најистакнатите имиња од неговото членство, а со тоа и без најголемиот град со кој раководеше член на партијата. Актуелниот градоначалник на Струмица, Костадин Костадинов ќе настапува како независен кандидат откако се одвои од партијата.
Засега остануваат сите можности, меѓу кои и партијата да се откаже од трката во Пробиштип.
