Трамп ја укина заштитата на Тајната служба за Камала Харис

Американскиот претседател Доналд Трамп ја укина заштитата на Тајната служба за поранешната потпретседателка Камала Харис, јави CNN повикувајќи се на документ со кој располага.

Во меморандум упатен до министерот за внатрешна безбедност, Трамп наложил прекин на сите безбедносни процедури кои претходно ѝ биле одобрени, почнувајќи од 1 септември.

Одлуката доаѓа во време кога Харис ја започнува турнејата за промоција на своите мемоари „107 дена“, што ќе бидат објавени на 23 септември. Нејзината советничка Кирстен Ален изјави дека Харис е „благодарна на Тајната служба за професионализмот и посветеноста“.

Со укинувањето на заштитата, Харис останува без агенти кои деноноќно ја чуваа, како и без федерална анализа на закани, заштита на електронска комуникација и обезбедување на нејзиниот дом во Лос Анџелес.

Според американскиот закон, поранешните потпретседатели имаат право на шестмесечна заштита, што за Харис заврши на 21 јули. Нејзината заштита беше продолжена уште една година со директива на Џо Бајден пред заминувањето од функцијата, но Трамп сега ја укина.