Францускиот премиер Франсоа Бајру се соочува со сериозна закана за опстанокот на својата малцинска влада, откако трите главни опозициски партии најавија дека на 8 септември нема да ја поддржат на гласањето за доверба.
Анкетата на Ифоп за француската телевизија ЛЦИ покажува дека околу 63% од Французите се за распуштање на парламентот и одржување нови избори. Истражувањето беше спроведено онлајн, со примерок од 1.000 испитаници.
Малцинската влада на Бајру е на работ на соборување, поради неговите планови за драстични кратења на буџетот, што ја засили политичката неизвесност и веднаш се одрази врз финансиските пазари – француските акции и обврзници се под силен притисок.
Одлуката за распуштање на парламентот мора да ја донесе претседателот Емануел Макрон. Според анкетата на Ифоп, 51% од испитаниците сметаат дека Макрон нема да го стори тоа. Доколку Бајру го загуби гласањето за доверба, претседателот има опција да назначи нова влада наместо да распушти парламент.
