Белгиските власти од септември ќе воведат засилени инспекции во продавниците за електрични тротинети, откако бројот на сообраќајни несреќи со овие возила драстично се зголеми, соопшти „Институтот за безбедност на патиштата Вијас“.
Според податоците, несреќите со електрични тротинети во првиот квартал од 2025 година се зголемиле за 61 отсто во споредба со истиот период минатата година. Во просек, биле регистрирани по пет несреќи дневно со смртни случаи или повредени лица.
Електричните тротинети стануваат сè почести во градовите како Брисел, Антверпен и Лиеж. Многу од увезените модели достигнуваат брзина повисока од дозволената законска граница од 25 километри на час. „Некои модели, особено оние од Кина, се исклучително популарни меѓу младите поради ниските цени и високите брзини“, предупредија од Вијас.
Министерот за заштита на потрошувачите, Роб Биндерс, најави построги проверки на дистрибутерите и предложи забрана за продажба на премногу брзи модели. „Внатрешниот пазар не застанува на нашите граници. Уред што е забранет овде, но слободно се продава на друго место, претставува ризик за белгиските потрошувачи. Затоа ни треба заеднички европски пристап“, изјави Биндерс.
Институтот Вијас побара воведување построги стандарди за големината на тркалата и побрзо одобрување на уреди за контрола на брзината кои ќе ги користи полицијата.
