Пентагон тивко ја ограничува употребата на американските тактички ракетни системи ATACMS од страна на Украина за удари длабоко во руска територија, што ја намалува способноста на Киев да се брани од руската инвазија, пишува Wall Street Journal повикувајќи се на американски официјални лица.
Според WSJ, конечната одлука за употребата на системите ATACMS ја носи министерот за одбрана, Пит Хегсет. Ниту канцеларијата на украинскиот претседател, ниту Министерството за одбрана на Украина не коментирале, како и Белата куќа и Пентагон, објавува Reuters.
Веста за американските проектили со долг дострел доаѓа во момент кога американскиот претседател Доналд Трамп е сè повеќе фрустриран поради трите години на војна и неможноста да се обезбеди мировен договор меѓу Русија и Украина. Откако самитот со рускиот претседател Владимир Путин и средбите со европските лидери и украинскиот претседател Володимир Зеленски не донеле видлив напредок, Трамп изјави дека разгледува воведување економски санкции кон Русија или повлекување од мировниот процес.
Трамп се надеваше дека ќе успее да организира билатерална средба меѓу Путин и Зеленски, но тоа се покажало како тешко. Рускиот министер за надворешни работи, Сергеј Лавров, изјави дека средба ќе се одржи само откако ќе се договори агендата за самитот, која сè уште не е подготвена. Путин повеќепати предупредил дека украинската војска не може да користи високопрецизно оружје со долг дострел без директно учество на НАТО офицери, што би значело директна инволвираност на Западот во војната против Русија.
