Хамас објави дека го прифатил новиот предлог од арапските посредници за прекин на огнот во Газа, каде што бројот на палестински жртви надмина 62.000 за време на 22-месечната војна. Израел засега не ја промени својата позиција и најавува продолжување на операциите.
Американскиот претседател Доналд Трамп изрази сомнеж во преговорите, барајќи Хамас да биде „соочен и уништен“ пред ослободување на заложниците. Израел, пак, разгледува планови за повторно заземање на градот Газа и други густо населени области, што дополнително ја влошува хуманитарната состојба.
Египет и Катар посредуваат во разговорите, со предлог за 60-дневен прекин на огнот, делумно ослободување на заложници и преговори за траен мир. Според египетски извори, новата понуда е слична на претходниот американски план, кој Израел го имаше прифатено.
Премиерот Бенјамин Нетанјаху вети дека војната ќе продолжи сè додека не се вратат сите заложници и Хамас не биде разоружан, а Израел не воспостави трајна безбедносна контрола во Газа. Хамас инсистира дека ослободувањето на преостанатите заложници е можно само со траен прекин на огнот и повлекување на израелските сили.
ОН и независни експерти ги сметаат бројките на Министерството за здравство на Газа за најверодостојни, иако Израел ги оспорува. Половина од жртвите се жени и деца.
