Унгарија е единствената членка на Европската Унија која не ја потпиша заедничката изјава за поддршка на Украина, поддржана од останатите 26 земји. Во документот се нагласува дека Украина мора да учествува во одлучувањето за сопствената иднина.
Долго време Унгарија има затегнати односи и со Украина и со мнозинството членки на ЕУ, а се смета за најблизок европски сојузник на Владимир Путин. Премиерот Виктор Орбан предупреди дека приемот на Украина во ЕУ „веднаш ќе ја вовлече Унијата во директен конфликт“.
Утрово, Орбан образложи дека не ја потпишал изјавата затоа што „таа поставува услови за состанок на кој лидерите на ЕУ не се поканети“. Тој истакна дека „ЕУ веќе е тргната настрана, а полошо е да се даваат инструкции од клупата“.
Орбан предлага дека единствен разумен чекор е иницирање самит меѓу ЕУ и Русија, сличен на состанокот САД-Русија.
Ова не е прв пат Орбан да се спротивстави на заедничката позиција на ЕУ кон Украина. Унгарија претходно оспори европски санкции против Русија и одби да потпише некои декларации за поддршка на Украина.
