Американскиот претседател Доналд Трамп побара Русија и Украина да постигнат договор за прекин на огнот и траен мир до 8 август, предупредувајќи дека во спротивно, САД ќе воведат дополнителни санкции и царини кон Москва.
„Време е за договор. Претседателот Трамп јасно стави до знаење дека тоа мора да се случи до 8 август. САД се подготвени да преземат дополнителни мерки за обезбедување на мирот,“ изјави високиот американски дипломат Џон Кели пред Советот за безбедност на ОН.
Трамп во вторникот најави дека ќе започне со воведување на царини и други економски мерки против Русија „за 10 дена“ доколку не се забележи напредок кон завршување на речиси три и пол годишната војна.
Иако Киев и Москва годинава одржаа три круга преговори во Истанбул, досега нема конкретен напредок освен размена на затвореници и тела на загинати.
Русија најави дека ќе продолжи со разговорите во Истанбул, но не го прифати рокот што го постави Вашингтон. „На Запад сè уште има сили кои го поддржуваат војувањето и го користат дијалогот само како средство за притисок врз Русија,“ изјави рускиот заменик-амбасадор во ОН, Дмитриј Полјански.
Украинската заменица-амбасадорка Кристина Хајовишин, пак, побара „единство, решителност и дејствување“ против руската агресија. Таа истакна дека за Украина, првиот чекор кон мир е „целосно, итно и безусловно примирје“ и повика на мир кој ќе биде „праведен и во согласност со Повелбата на ОН“.
Трамповиот ултиматум се смета за досега најостра порака до рускиот претседател Владимир Путин од страна на Вашингтон, што може да влијае врз текот на дипломатските напори во наредните денови.
