Хеликоптерот „Блек Хок“ од Чешка, со седумчлена посада, попладнево пристигна на Меѓународниот аеродром во Скопје и од утре ќе се вклучи во гаснењето на големиот шумски пожар на планината Готен, од беровската страна.
Директорот на Дирекцијата за заштита и спасување, Стојанче Ангелов, соопшти дека хеликоптерот располага со ведро кое носи 3,4 тони вода, и дека неговата ангажираност ќе започне уште утре наутро.
Покрај чешкиот екипаж, во Берово се очекува да пристигнат и 62 пожарникари од Словенија, заедно со 18 специјализирани противпожарни возила.
„Во текот на утрешниот ден ќе бидат активирани и дополнителни национални сили и ќе се фокусираме на овој пожар, бидејќи на другите локации состојбата е релативно стабилна“, изјави Ангелов на денешната прес-конференција.
Тој информираше и дека Република Австрија понудила помош со 80 пожарникари, а Франција со уште 50, што дополнително ја засилува регионалната поддршка во справувањето со огнената стихија.
