Престојот во затвор обично значи казна, но низ светот расте еден сосема поинаков тренд – затворскиот туризам, каде љубопитни патници доброволно „влегуваат зад решетки“ за автентично искуство. Овој необичен облик на туризам нуди уникатно сместување во поранешни затвори, кои се претворени во хотели, хостели или културни објекти со задржана атмосфера од минатото.
Од Љубљана до Бостон, од Оксфорд до Истанбул, туристите се во потрага по „забранетиот вкус“ – дали е тоа да се преноќи во поранешна ќелија, да се носат пругасти пижами или да се вечера во ресторан зад решетки. Секое од овие места има своја историја, трансформирана во туристичка приказна.
Во Словенија, хостелот „Целица“ ги комбинира затворските ѕидови со уметнички дух, додека во Бостон, хотелот „The Liberty“ нуди луксузна верзија на поранешниот затвор, со 298 дизајнерски соби и поглед на пристаништето. За оние кои бараат автентичност, германскиот „Алкатраз“ нуди вистински ќелии, решетки и пругасти пижами.
Во Холандија, хотелот „Хет Арестхуис“ ги комбинира затворските коридори со модерна удобност, а во Шведска, „Лангхолмен“ ги задржал дури и старите весници на ѕидовите. Во Оксфорд, затворската комора за егзекуции сега е… сала за свадби.
Можеби најлуксузната трансформација е во Истанбул, каде хотелот „Four Seasons“ претходно бил политички затвор. Денес, тој нуди 5 ѕвезди удобност за гостите кои некогаш би биле затвореници.
Затворскиот туризам е повеќе од каприц – тоа е спој на историја, емоции и авантура. И додека некои го гледаат како бизарност, за други е единствена шанса да „доживеат“ живот зад решетки – без последици и со појадок вклучен во цената.
