Најмалку 30 лица се повредени, од кои седум критично, откако возило удри во толпа луѓе пред ноќниот клуб „Вермонт Холивуд“ во Ист Холивуд, рано изутринава, јавуваат локалните власти и американските медиуми.
Инцидентот се случил во сабота, 20 јули, околу 1:00 часот по полноќ, кога 29-годишниот Фернандо Рамирез, претходно исфрлен од клубот поради нарушување на редот, се вратил со автомобил и со голема брзина влетал во група посетители што чекале ред пред влезот.
„Од безбедносните снимки е очигледно дека станува збор за намерен чин“, изјави капетанот на ЛАПД, Бен Фернандес, за Los Angeles Times. Според него, возилото преминало на тротоарот, удрило во штанд за храна, асистентски подиум и директно влетало во толпата.
Сцената била хаотична – паника, повици за помош и повредени луѓе насекаде. Според пожарникарите, жртвите се претежно млади лица, на возраст меѓу 20 и 30 години. Дел од нив се здобиле со скршеници и повреди на меките ткива, додека најмалку едно лице има и прострелна рана.
По сударот, возачот бил извлечен од автомобилот од страна на обезбедувањето, врзан со лисици, но веднаш потоа бил физички нападнат од повеќе минувачи. Во метежот, едно лице од другата страна на улицата го застрелало Рамирез во грбот. Тој бил хоспитализиран со повреди и е уапсен под сомнение за напад со смртоносно оружје.
Полицијата не пронашла докази за терористички мотив, но потврдува дека возачот најверојатно бил под дејство на алкохол. Седум жртви се во критична состојба, шест во сериозна, а десет се хоспитализирани со полесни повреди. Уште седум лица одбиле медицинска помош.
Истражната постапка е во тек, а полицијата продолжува со распит на сведоци и анализа на видео материјали од местото на настанот.
