Министерството за одбрана на САД склучи договор вреден 185 милиони евра со компанијата xAI, која ја развива вештачката интелигенција Грок, чатбот на Елон Маск. Овој договор е дел од програмата „Grok for Government“, усогласена со иницијативата на администрацијата на Доналд Трамп за брзо воведување на AI технологии во државните институции.
Грок, кој предизвика критики поради објавување антисемитски пораки и фалби за Адолф Хитлер, сега ќе се користи за поддршка на националната безбедност, со пристап до најновата верзија, Грок 4. xAI ќе обезбедува и техничка поддршка во класифицирани услови, што е дел од обврските кон Пентагон.
Пентагон веќе има слични договори со други големи AI компании како Anthropic, Google и OpenAI, со максимална вредност од по 185 милиони евра.
„Воведувањето на AI ги менува можностите на Министерството за одбрана да ги поддржи нашите војници и да ја одржи стратешката предност пред противниците“, изјави Даг Мати, директор за дигитални и AI технологии во Министерството.
Односите помеѓу Маск и Трамп се влошија по инвестирањето на Маск во кампањата на Трамп за 2024 година и неговата кратка служба во владиниот Оддел за ефикасност, од кој подоцна поднесе оставка поради несогласувања околу буџетските трошоци.
И покрај политичките тензии, договорот покажува дека Пентагон продолжува да соработува со Маск и неговата компанија за интеграција на напредни AI решенија во одбраната на САД.
