Израел возврати со 20 борбени авиони: Хутите повторно нападнаа, сирени завија јужно од Ерусалим
Израелската војска утрово соопшти дека биле истрелани две ракети од територијата на Јемен кон Израел, во нов напад изведен од страна на бунтовниците Хути, кои уживаат поддршка од Иран.
Според соопштението, израелската противвоздушна одбрана се обидела да ги пресретне проектилите, а засега се утврдува дали обидите биле успешни. Брзата помош „Маген Давид Адом“ информираше дека досега не се пријавени повредени лица, ниту директни удари врз цели на теренот.
Сирени за воздушна опасност се огласија во повеќе населени места јужно од Ерусалим, како и во близина на Мртвото Море.
Нападот доаѓа само неколку часа по масовната израелска воздушна офанзива врз цели на Хутите во Јемен. Според израелската армија, околу 20 борбени авиони лансирале над 50 парчиња муниција кон стратешки цели, меѓу кои пристаништата Ходеида, Рас Иса и Салиф, како и електраната Рас Хатиб.
Министерот за одбрана на Израел, Јоав Галант, потврди дека нападите биле насочени и кон брод кој Хутите го заплениле уште пред две години во Црвеното Море.
„Како што и предупредив, Јемен ќе биде третиран како Техеран. Секој што ќе се обиде да му наштети на Израел ќе биде погоден. Хутите ќе продолжат да ја плаќаат цената за своите постапки“, изјави Галант.
Нападите беа придружени со наредба за евакуација на цивили од подрачјата во близина на целите во Јемен. Според локални извори, во текот на ноќта биле слушнати силни експлозии.
Хутите продолжуваат со истрелување беспилотни летала и ракети кон Израел, и покрај примирјето постигнато меѓу Израел и Иран минатиот месец.
Од ноември 2023 година, оваа бунтовничка група изведува напади врз трговски и енергетски бродови во Црвеното Море, во знак на поддршка за Палестинците во Појасот Газа. Нападите ги загрозуваат морските патишта кон Суецкиот канал – клучна рута за глобалната трговија меѓу Азија, Блискиот Исток и Европа.
