Американскиот претседател Доналд Трамп ги отфрли како „смешни“ амбициите на Илон Маск да формира нова политичка партија, додавајќи дека таквиот потег само би предизвикал конфузија во системот што, според него, е дизајниран за две доминантни сили.
Говорејќи пред новинарите, Трамп коментираше:
„Мислам дека е смешно да се основа трета партија. Републиканската партија постигна огромен успех. Демократите изгубија компас, но американскиот политички систем отсекогаш функционирал како двопартиски. Третите партии никогаш не успеваат. Тоа само создава забуна.“
Тој, исто така, го обвини Маск за можен конфликт на интереси, потсетувајќи дека негов поранешен соработник, кој бил назначен на чело на НАСА, сега би можел да се најде во судир меѓу јавните и приватните интереси на Маск во вселенската индустрија.
Реакцијата на Трамп доаѓа само еден ден откако Маск ја објави намерата да ја формира „Американската партија“, која ќе настапи на изборите следната година, насочена против – како што вели Маск – растечкото трошење и даночните олеснувања воведени со законската рамка што ја поддржа Трамп.
„Која, по ѓаволите, беше поентата на ДОГЕ ако единствено резултира со зголемување на долгот за 5 трилиони долари?“ напиша Маск на социјалната мрежа Икс, осврнувајќи се на агенцијата за буџетско намалување што некогаш кратко ја водеше.
Критичарите на овој закон – попознат како „големиот, прекрасен закон“ – предупредуваат дека тој може значително да го зголеми федералниот дефицит и да ја влоши економската стабилност на САД.
Маск најави дека неговата нова партија ќе се бори да ги симне од функција токму оние републикански конгресмени кои го поддржале овој закон, најавувајќи сериозен предизвик на наредните среднорочни избори.
