Данска најави дека е подготвена Европската Унија да ја искористи целата своја правна рамка против Унгарија поради систематско кршење на основните вредности на Унијата — вклучително и активирање на членот 7, познат и како „нуклеарна опција“, пишува „Политико“.
„И понатаму сме сведоци на кршење на темелните вредности на ЕУ“, изјави данската министерка за европски прашања Мари Бјере. Таа најави дека Данска ќе продолжи да го поддржува постапувањето според членот 7 и ќе учествува во сослушувањата за Унгарија.
Членот 7 од Договорот за ЕУ овозможува санкционирање на земја-членка што систематски ги нарушува принципите на правната држава, вклучително и суспендирање на нејзиното право на глас во Советот на ЕУ. Тоа е најострата правна мерка што постои во рамките на Унијата, но досега никогаш не била целосно активирана.
Бјере исто така повика на разгледување на можноста за ограничување на пристапот до европските фондови за земји што ги прекршуваат европските закони.
Покрај тоа, како дел од данското претседателство со Советот на ЕУ, Бјере го истакна прашањето за проширувањето на Унијата како приоритет. Таа ја критикуваше Унгарија поради континуираната блокада на украинското членство и порача дека Данска е подготвена да размисли за сите можни политички и правни решенија за да се продолжи процесот на проширување.
Ако земјите-членки одлучат да ја интензивираат постапката според членот 7, Унгарија би можела да го изгуби правото на глас во клучни европски политики, вклучително и во одлуките за идни членства. Но, според дипломати во Брисел, за таков потег е потребна цврста поддршка од Франција и Германија — која засега недостасува.
