Според утринскиот извештај на Центарот за управување со кризи (ЦУК), до 07:00 часот на 4 јули 2025 година се евидентирани вкупно 34 пожари на отворен простор низ државата, од кои 31 се изгаснати, додека три остануваат активни.
Активни пожари се бележат во следниве општини:
Прилеп: кај селото Бешиште, каде пожарот се проширил во квалитетна мешана шума, а обновен е и кракот кај селото Градешница (општина Новаци);
Македонски Брод: кај селото Црешнево;
Кочани: во населбата Трајаново Трло, каде гори сува трева и деградирана ниска шума.
Од ЦУК информираат дека нема пожари кои се под контрола во моментот. Поголемиот број од изгаснатите пожари се однесуваат на запалена ниска вегетација, ѓубришта и депонии, како и неколку случаи во шумски предели низ повеќе општини.
