Патниците на крстарења од 1 јули 2025 година ќе мора да платат нов туристички данок за посета на најпопуларните грчки острови Санторини и Миконос. Данокот изнесува 20 евра и ќе важи во периодот на врвната туристичка сезона, која трае до 30 септември, со цел да се намали прекумерниот туризам во овие атрактивни дестинации.
Санторини и Миконос секоја година ги посетуваат илјадници патници од бродови за крстарење, кои често предизвикуваат пренатрупаност на островите. Првично данокот требаше да почне да се наплаќа од 1 јуни, но беше одложен поради намалениот туристички интерес на Санторини по земјотресот во првата половина од годината.
Патниците ќе ја плаќаат таксата при пристигнување, а собраните средства ќе бидат инвестирани во туристички и инфраструктурни проекти на островите.
Оваа такса не важи само за Санторини и Миконос – за сите други грчки пристаништа патниците на бродови за крстарење ќе плаќаат 5 евра за време на високата сезона.
Во преодниот период, од 1 април до 31 мај и од 1 до 31 октомври, таксата за посета на Санторини и Миконос ќе изнесува 12 евра, додека за останатите пристаништа ќе биде 3 евра. Од ноември до крајот на годината, таксата ќе се намали на 4 евра за двата острови и на 1 евро за другите локации.
Новиот туристички данок е воведен по рекордна сезона за индустријата за крстарења во Грција. Според податоците на Здружението на грчки пристаништа (ELIME), во 2024 година во земјата пристигнале 5.490 бродови за крстарење со вкупно 7,93 милиони патници.
Пристаништето Пиреја, близу Атина, регистрира најголем број пристигнувања, а Санторини и Миконос се на второто, односно третото место по посетеност.
Се очекува оваа сезона Миконос да прими околу 900 бродови за крстарење, со вкупно 1,5 милиони туристи, јавува „Дејли Меил“.
