Бугарскиот амабасадор Ангел Ангелов денеска беше во посета на Општина Штип. Целта на посетата е, како што, рече да се запознае со еден од најновите градоначалници во земјава, но и да донираат 30 пакети помош за социјално ранливи семејства, градоначалникот на Штип, Сашко Николов вели дека нема ништо против во нашите училишта факултативно да се изучува бугарскиот јазик.
– Во време на пандемија да се помогне и тоа наша хуманитарна помош и досега имаме донирано четири тони храна. Го искористивме тој момент за да се запознаеме со градоначалникот, вели Ангелов.
Градоначалникот на Општина Штип, Сашко Николов, истакна дека имале пријателска средба, на којашто дискутирале за проектите кои ги има Општина Штип преку Програмата за меѓугранична соработка со Бугарија.
-Разговаравме и за проекти, што ќе следуваат во иднина, разговаравме и за дополнителна помош и инвестиција и иновација во нашиот образовен систем, локално во нашиот град. Меѓутоа разговаравме и на зближување и збратимување со општините, што се од суштинско значење за Општина Штип. Во духот на добрососедството, во духот на подобрата комуникација, дури дадов и предлог до самиот амбасадор дека немам ништо против во нашите училишта факултативно да се изучува бугарскиот јазик, вели Николов.
Смета дека тоа ќе биде и мост на зближување меѓу двата народи и како што рече во духот на европските вредности ќе продолжат со зближување и добрите односи меѓу двете земји.
