Поранешниот американски претседател Доналд Трамп изјави дека е пронајдена група „многу богати луѓе“ кои сакаат да ја купат американската подружница на TikTok, и најави дека нивните имиња ќе бидат објавени за околу две недели. Изјавата ја даде во неделното интервју за Fox News во емисијата „Sunday Morning Futures“ со Марија Бартиморо.
„Имаме купувач за TikTok“, рече Трамп, додавајќи дека договорот веројатно ќе треба да добие зелено светло од Кина. Тој изрази уверување дека кинескиот претседател Си Џинпинг ќе се согласи со продажбата.
САД под водство на Трамп уште во 2020 година започнаа притисок врз кинеската компанија ByteDance, сопственик на TikTok, да се откаже од американската верзија на апликацијата поради безбедносни загрижености. Законот усвоен во 2024 година бара ByteDance целосно да го продаде американскиот дел од TikTok до 19 јануари 2025 година или да покаже значаен напредок кон тоа, во спротивно апликацијата ќе биде забранета.
Иако пролетва се појави предлог-договор за трансформација на американската подружница на TikTok во одделна компанија под контрола на американски инвеститори, процесот беше запрен откако Кина сигнализираше дека нема да даде одобрување, особено по заканите на Трамп за нови царини на кинески производи.
Трамп, кој признава дека TikTok одиграл улога во мобилизација на млади гласачи што му помогнало да победи на изборите, веќе трипати го продолжи рокот за продажба. Тој тврди дека најновата понуда има сериозен потенцијал и се надева на позитивен одговор од Пекинг.
