Контроверзно интервју од 2024 година со поранешниот ирански претседател Махмуд Ахмадинеџад повторно предизвика внимание на Блискиот Исток, откако тој изнесе шокантни тврдења за масовна инфилтрација на израелската разузнавачка служба Мосад во самиот врв на иранската безбедносна структура.
Ахмадинеџад тврдеше дека шефот на специјалната единица задолжена за борба против израелската шпионажа всушност бил двоен агент кој со години работел за Мосад, заедно со уште дваесетина други припадници на истата служба. Според него, тие се одговорни за низа пробивања во иранскиот безбедносен систем, вклучително и кражбата на нуклеарната архива од Техеран во 2018 година и атентатите на неколку водечки ирански нуклеарни научници.
Новите информации ја потврдуваат и улогата на жени во Мосадовите операции – прикриени под хиџаб, дел од агентките биле директно вклучени во ликвидации, шпионажа и логистичка поддршка. Книгата „Женските воини на Мосад“ открива дека тие играле клучни улоги во повеќе операции, вклучително и во подготовките за спектакуларната кражба на документи од строго чуван магацин во Техеран.
Според безбедносни анализи, Мосад денес има помеѓу 30 и 40 активни ќелии на иранска територија, главно составени од локални соработници. Нивните задачи се разновидни – од собирање информации до изведување саботажи и атентати. Најголемо внимание предизвика операцијата од 2018 година, кога израелските агенти успеаја да изнесат десетици илјади документи со чувствителни податоци, делумно и преку дигитален трансфер.
Во јуни 2025, иранските власти спроведоа голема акција и уапсија најмалку 28 лица под обвинение за шпионажа за Израел, меѓу кои имало и припадници на безбедносни служби, научници и технички персонал. Откриена била и тајна фабрика за дронови, како и магацини со експлозиви и саботажна опрема.
И покрај чистките, аналитичарите предупредуваат дека Мосад останува длабоко вкоренет во Иран, користејќи комбинација од човечка разузнавачка мрежа и вештачка интелигенција. Израелската служба успева да обезбеди прецизни напади врз чувствителни цели, додека иранскиот режим живее во состојба на постојан страв, сомнеж и внатрешна нестабилност.
Иран, според експертите, денес се соочува со најсериозниот безбедносен предизвик во својата современа историја – и со сенката на Мосад која уште лебди над Техеран.
