И покрај нападите, Иран сè уште располага со залихи од збогатен ураниум – разузнавачки извештај
И покрај американските воздушни напади врз клучните ирански нуклеарни објекти, Иран и натаму располага со најголемиот дел од своите залихи на високо збогатен ураниум, покажуваат прелиминарни разузнавачки проценки на кои се повикува Фајненшл тајмс.
Според два независни извора, 408 килограми збогатен ураниум близу до ниво за оружје не биле складирани во Фордоу, туку биле распоредени на повеќе локации пред нападите. Иако нападот нанел значителна штета на објектот Фордоу, нема докази за целосно уништување.
САД користеле бомби за разбивање бункери, напаѓајќи ги постројките во Фордоу, Натанц и Исфахан, но Иранските власти тврдат дека ураниумот бил преместен однапред.
Американскиот претседател Доналд Трамп сепак инсистира дека нападите ја „уништиле“ нуклеарната програма, иако прелиминарните проценки на разузнавачките служби наведуваат дека Иран би можел да продолжи со развој на нуклеарно оружје ако има пристап до скриени центрифуги и материјал.
Израелската комисија за атомска енергија оцени дека нападите „ја вратиле“ иранската програма неколку години наназад, но европските сојузници сè уште немаат добиено целосен извештај и не добиваат јасни насоки од Вашингтон.
Иран, од своја страна, повторува дека неговата нуклеарна програма е цивилна, и најави мерки за дополнителна заштита на објектите.
Според дипломатски извори, европската политика кон Иран е во застој, бидејќи САД не даваат јасна стратегија, а разговорите меѓу Трамп и европските лидери не донеле конкретни резултати. Повеќето западни влади очекуваат нова американска иницијатива, додека постои загриженост дека Израел би можел да повлече нови потези самостојно.
