Во срцето на летото, кога жештината ги поплавува градовите и становите се претвораат во печки, клима-уредот станува најдобриот пријател на секое домаќинство. Но, со растот на температурите, расте и бројот на нули на сметките за струја. Во продолжение можете да прочитате неколку совети со кои ќе заштедите електрична енергија.
1. Не ја намалувајте температурата премногу
Најчестата грешка што ја прават луѓето е да ја наместат климата на 18 или 19 °C со надеж дека така побрзо ќе се излади просторијата. Тоа е мит. Клима-уредот ќе троши и до 30% повеќе струја без да го забрза ладењето. Идеална и енергетски ефикасна температура за лето е 24 до 26 °C.
2. Затворете ги прозорците и вратите
Кога климатизерот работи, не дозволувајте топлиот воздух однадвор да влегува во просторијата. Дури и мала пукнатина може да ја намали ефикасноста. Ако не е можно целосно затворање, најмалку засенете ги прозорците со ролетни или завеси, особено во попладневните часови.
3. Редовно чистете ги филтрите
Клима со затнат или валкан филтер работи потешко и троши повеќе струја за ист ефект. Препорачано е чистење на филтрите еднаш месечно во летната сезона. Ако имате домашни миленици или живеете во прашлива средина, и почесто.
4. Искористете го тајмерот и функцијата „sleep“
Многу клими имаат тајмер или функција за автоматско гасење/палење. Наместете ја да се исклучи ноќе или да се вклучи непосредно пред да се вратите дома. Функцијата „sleep“ постепено ја зголемува температурата во текот на ноќта – и ви штеди струја без да го жртвува вашето чувство на удобност.
5. Сервис еднаш годишно е задолжителен
Професионален сервис на клима-уредот, вклучувајќи мерење на притисок, полнење фреон, дезинфекција и внатрешно чистење, ќе го зголеми нејзиниот работен век и ќе ја одржи ефикасноста. Се препорачува редовен годишен сервис на почетокот на летната сезона.
6. Користете вентилатор за подобра циркулација
Мал трик со голем ефект: вклучете тавански или стоечки вентилатор за да го распределите студениот воздух рамномерно низ просторијата. Така климата може да работи на повисока температура (на пример 26 °C), а сепак да се чувствува пријатен амбиент.
7. Изолирајте ја просторијата каде што работи климата
Ако имате можност, поставете термо-завеси, гумички на прозорци, па дури и подлоги за врати – сè што ќе ја спречи топлината да влезе или студот да избега. Добрата изолација е најдолгорочната инвестиција за заштеда.
8. Избегнувајте работа на климата во најтоплиот дел од денот
Во попладневните часови (меѓу 13 и 17 часот), апаратите работат под најголем напор. Доколку не сте дома, оставете ја исклучена или поставете тајмер. Клима-уредот троши најмногу струја кога стартува од 0, па затоа е подобро да работи умерено, отколку често да се гаси и пали.
