Гувернерот на Народната банка, Трајко Славески, најави сериозен потег во насока на намалување или укинување на банкарските провизии за платежни услуги. Според него, овие трошоци, кои сочинуваат околу 18% од нето приходите на банките, се непотребен товар за граѓаните и бизнисите.
„Овие услуги треба да станат јавен интерес и право, а не привилегија,“ изјави Славески пред средбата со Македонската банкарска асоцијација (МБА), додавајќи дека ваквиот модел веќе се применува во Европската Унија.
Првиот чекор ќе биде направен од Народната банка, со намалување на трошоците за плаќања преку КИБС. Очекувањата се дека банките ќе го следат овој пример, а ако не, државата е подготвена да воспостави регулативи и транспарентен ценовник.
Посебен акцент се става на укинување на провизиите за подигање готовина од банкомати на туѓи банки, како и трошоците за пренос на сметки меѓу банки. Ова, според гувернерот, ќе ја поттикне финансиската вклученост и ќе ја ограничи сивата економија.
Банките изразија отвореност за дијалог, но нагласија дека имаат значајни трошоци кон надворешни провајдери и во делот на картичното работење. Дел од претставниците тврдат дека надоместоците се симболични – „во висина на едно кафе“.
Славески потсети дека банките секогаш биле клучен фактор во економските реформи, од преземањето на платниот промет, преку дигитализацијата на картичното работење, до неодамнешното приклучување на Македонија во европскиот платен систем СЕПА.
„Сега е време за следниот чекор. Ова е пат кон правичност, инклузија и модерна економија“, нагласи гувернерот.
