Со нов закон потпишан од гувернерот Грег Абот, Тексас ќе стане најголемата американска сојузна држава што ќе наложи задолжително истакнување на Десетте Божји заповеди во сите училници на јавните училишта. Законот, кој лесно помина во државниот Сенат и Претставничкиот дом под контрола на републиканците, предвидува дека секоја училница ќе мора да има постер или урамена копија од специфична англиска верзија на заповедите, во димензии од 41 на 51 сантиметар.
Мерката е дел од пошироките напори на конзервативните држави за враќање на религијата во јавните училишта. Тексашките законодавци исто така усвоија закон со кој се дозволува секојдневен доброволен период за молитва или читање на верски текст за учениците и наставниците за време на училишниот ден.
„Фокусот на овој закон е да се разгледаат историски важните елементи за нашата нација од образовен и судски аспект“, изјави републиканската пратеничка Кенди Ноубл, една од носителите на законот.
Но, новата регулатива најверојатно ќе се соочи со правни предизвици. Критичарите предупредуваат дека законот претставува кршење на уставното начело за одвоеност на црквата и државата. Слична мерка неодамна беше блокирана во Луизијана, каде федералниот апелациски суд ја прогласи за неуставна, а сличен закон во Арканзас исто така е предмет на судски спорови.
Противниците на законот, меѓу кои има и христијански и еврејски верски водачи, истакнуваат дека заповедите се толкуваат различно во различни религии и деноминации и не секој ученик може да се поврзе со нив. Во отворено писмо, тие потсетуваат дека Тексас има илјадници ученици од други вероисповеди, кои не ја делат истата религиозна традиција.
Во Тексас моментално има речиси шест милиони ученици во околу 9.100 јавни училишта, што значи дека новиот закон ќе има широко и потенцијално контроверзно влијание врз образовниот систем во државата.
