Израелските воздушни напади значително ги нарушиле способностите на Иран за ракетни напади врз Израел, пренесува Институтот за проучување на војната (ISW) од Вашингтон. Според проценките на израелската армија, уништени се 35–40% од иранскиот балистички арсенал, додека околу половина од лансирните системи се онеспособени. Како последица, Иран е принуден да ги премести своите ракетни сили подлабоко во внатрешноста на земјата, далеку од дофат на Израел.
Со префрлување на локациите за лансирање во Исфахан, Иран повеќе не може да користи ракети со среден дострел како „Хај Касем“, „Фатах“ и „Хејбар Шекан“, туку мора да се потпре на ракети со долг дострел како „Емад“, „Гадр“ и „Сеџил-1“. Првите две користат течно гориво, што го отежнува нивното користење и логистика, додека „Сеџил-1“ (со цврсто гориво) првпат бил употребен на 18 јуни.
Според ISW, бројот на ирански ракети истрелани врз Израел последниве денови е значително намален. Израел проценува дека Иран не се воздржува од напади заради штедење на проектили, туку поради загубата на капацитет да организира координирани напади. Воени извори велат дека Техеран би ја употребил преостанатата залиха само доколку процени дека режимот е егзистенцијално загрозен.
Во периодот од 15 јуни досега, нема нови жртви од ирански напади, додека претходно биле убиени 24 израелски цивили. Израелските воздушни напади сега се насочени кон уништување на иранските производни капацитети за ракети, но и институции што се столбови на внатрешната безбедност на режимот во Техеран.
Во меѓувреме, иранскиот режим покажува сериозна загриженост за можни внатрешни немири: забележани се прекини на интернет низ цела држава, а повеќе лица се уапсени под сомнение за шпионажа за Мосад. Израел уништил и центар на иранската полиција во Техеран, за кој тврди дека е дел од репресивниот апарат на режимот.
Покрај воените акции, забележани се и кибернапади од произраелски хакерски групи врз ирански медиуми и финансиски институции. Според експертите, Иран ќе има големи тешкотии да го обнови својот арсенал, особено ако Израел продолжи да ги таргетира фабриките и складиштата поврзани со ракетната индустрија.
Додека се чека одлуката на Доналд Трамп за евентуално вклучување на САД во конфликтот, Израел продолжува со стратегијата на системско слабеење на воените и безбедносните капацитети на Иран.
